Thaqi shrdingya o konsultipe e politikune partienge liderencar

188

Yekh kurko palo Raipasko pelaripe, e Kosovako presidento, Hashim Thaqi shrdingya o konsultativune kedibya e partienge liderencar. Akaleya manglolape te lempe o bacakya vash nakhavipe e politukuna situaciako.

Ano adivuno sabay, Thaqi sinele trin kedibya, kote may angle maladilo e sherunoministrea ano oblige, Albin Kurti, palo leste e sheruneya kotar LDK, Isa Mustafa thay ano agor e sherunea taro PDK, Kadri Veseli

Sakole lidereske o Thaqi ulavgya 30 minutya, numay o kedibe e Kurtea lugyardilo may but se kobar gndingya o Presidenti.

O kedibe shrdingya pe ora 10:00 thay palo akava o Kurti iklisto anglo medie vash te mothavel o lafipe kova kergya e Thaqea. Ov phengya kay o presidenti na manlape te lelpe manushenge thay partiyenge anavencar, numay e datumyencar vash o neve alosaripya. 

Palo akava maladipe o Thaci ajukergya e Isa Mustafa sar sheruno e Partiako LDK.

Mustafa phengya kay ov sar sheruno e partiako LDK si pro vash te kriirinen nevo Raipe.

Agorutno kedibe e Thaqesko sine e PDKeske sherunea, Kadri Veseli.

“Saren janena kay nashti adikergyona o alosaripya ano pandemiako vahti angleder 45 dive”, phengya o Kadri Veseli. Ov phengya kay si Hipokrizia te sine kay ano akava momento gndina vash o alosaripya kote nasi shayipe te oven angleder 45 dive, amen na manga te rezikina amare dizutnen.

Kobar agorisale akala trin kedibya o Presindenti phengya kay taysa ka lugyarel te arakhelpe e aver partiyenge lideryencar.

Thaqi phengya kay sakoya deciziya koya ka lelpe ka ovel ano respektipe e Kosovaka Thamidarina.

“Ini seske siyam ano phare dive e coronaviruseske, o institucionalno jivdipe ani Kosova lugyarla e demokraciako funksionipe. Adive maladilum e sherunencar taro LVV, LDK thay PDK pali mocia e napakyavipaski mamuy e Kosovako Raipe. Me sim musay te respektinav e Thamidarin thay e amare thaneske krisya, vash te shrdinav o konsultipe e Kosovake partienge liderencar  vash o mangle bajakya kola si mahatne te lugyara o funksionipe e instituciengo ani Kosova yase te kriirina neve institucia e neve Raipaske”, sine alava e Presidenteske palo trin kedibya kola adikardile e orate 10:00 jikana ov na iklisto pi konferancia.