Terzimahallake beshutne palem lenape vast-vasteya

652

Terzimahallake beshutne ano shero e aktivistyencar sar: Shenoll Veseli, Fikrim Menekshe, Ferdi Ago, Qenan Shope thay Armend Veseli arakle yekh forma vash te brahinen pere mahallake beshutnen.

Ano lafipe mashkar peste o upreleparde aktivistya ande karari kay palem te len yekh inciativa vash o angloaqhavipe e Coronavirusesko. Ini seske angle hazeri 2 kurke, konkretno pe data 30 Marti on thovde thay shusharde piri mahalla.

Akaya ver o shusharipe ulo ani aver forma kote o aktivistya kerde yekh rodlaripa ano Shusharipaski Kompania “Eko Regjioni”, kola yekhatar aprovinde o rodlaripe kotar o pakyavale beshtune e Terzimahallke. Thay pe adisuni data 12 Aprili 2020 ale vash thay thovde e Terzimahalla.

Palo shusharipe e paynea kotar o leparni kompania on ikliste thay kedime love sakole kherestar vash te dezinfektinen e mahalla mashkari yekh privatuni kompania. Ani akaya laqi idea pashile vi o aver beshutne, ayekha sakova kher kontribuingya 1 vay 2 eurencar te realizingyol vi o dezinfektipe e mahallako. Vash o kompletipe e llovengo kova manglilo kotar e Dezinfekciaki kompania “Eko Pastrimi” dende kontributi vi e Organizacia “Terzimahalla” koya pashe yekh bersh sitoy gatisarni vash sasavo azhutipe para mahallako.

Akaleya diklola kay o aktivistya, beshutne, kompania thay organizacia phikodendi kotar e diasporake prala lelepe vast-vasteya thay realizinende pandar yekh mahatni akcia kolaki res/cili si te angloaqhavgyol o infektipe e romengo e virusea COVID-19.

O khetanipe e Terzimahallako si misal e aver mahalenge, akava mothavgyola andar historia numay ini ano aktualune dive.

 

 

 

Vash te ana pi godi pandar yekh ver e Terzimahalla akhardi “Nusret Seharsoy” si may purani mahalla ano Prizren, thay koya konsidiringyola “kuna” kote vakergyola thay garavgyola e romani chib, vi e kultura… ano Prizren thay Kosova.