PRYK ano ledeipe e organizacia Rom Prizren ulavela paketya thay varo e qorolenge

255

O sheruno e Partiako PRYK thay deputeti ano Kosovako Parlamenti, r.Albert Kinolli, ano ledeipe e sherunea kotar e organizacia Rom Prizren, rayo Muhamed Ali Arben Merxha azhutinena e romen ani akaya phari situacia sar si e pandemia.

Akaleya amen kera janglaripe kay sa o qorole roma e Prizrenoske si te furnizingyon akale leparde sheyencar phenlla o rayo Arben Merxha.

“Kotar yekh prall korahayi kova phandilo amencar thay dengyamen 200 paketya thay 200 ravala varo vash te ullava e qorole romenge ani akaya situacia. O paketya resle ano amare vasta pe data 9 Aprili 2020, kote po shero e r.Armend Veselea sar aktivisti e Partiako thay a terzimahallake terne qhavencar sinamen shaipe te akhara o leparde sheya vash te muka ano Romano Centro kova araklola ani Terzimahalla thay si ano mashkar e Mahallako”, phenlla o direktori e organizaciako Rom Prizren.

O rayo Arben Merxha phenlla kay vash o informipe e manushengo vash te len akala leparde sheya on janglarde sakolla mahallake muyale (sheruno e mahallako) vash te janglarel sakole beshutne ani piri mahalla.

Olengi akcia vash o ulavipe akale sheyengo shrdingya adive thay si te lugyargyol ji sakoya qoroli familia si te furnizingyol yekhe paketeya vay yekh ravalo varoa.

Vash o agor diklola kay o organizacie solidirizingyona e qorole manushencar kola silen phare jivdipaske kondicie vash te nakhaven so may shukar akaya situacia e virusea COVID-19 mangipeya kay amare roma te na infektingyon.