1 Juni e Qhavorengo dive

94
Kindergarten kids friends arm around sitting smiling

Avdive si mashkarthemutno dive vash e Qhavorengo garavipe/arakhipe, kote sa o dadallarya, rashtre thay amalipe respektinena e qhavoren thay lenge hakaya. Sakova bersh ovena but aktivitetya vash o qhavore ani sah lumia kote tretiringyona o teme vash olengo sastipe, respektipe e hakayengo kote realizingyona festivune khelipya. Ano akava dive ovela sensibilizibe vash te aqhavgyol o zori thay o abuzipe karshi e qhavorenge.

O Unicef e bershestar 1950 kerla buti e 190 rashtrennge familiencar, raipyencar thay organizaciencar vash te garantinen e qhavorenge hakaya kote sakova qhavoro musay si tretiringyol ano beraberune forme. Sah akava si vash te phergyon o jivdipaske mangipya, te bayron bizo zori thay te bayrargyol olengo potenciali vash yekh suksesuni kariera.

Vash e bibaht pandar milionya qhavore siton ano kolin e zoresko, abuzizmesko thay diskriminipasko thay but averenge nashti garantingyola o sastipe, habepiibe, beshibe, skoluipe kote on diklargyona sar obyekta vash triumfipe e lovengo iklipa te mangen pe droma.

Vash e bibaht ano akava bersh e Prizrenoski Komuna nani diklardi nisavo aktiviteti vash o qhavore feriso o virusi pandar araklola mashkar amande. Pakyavipeya ka aver bersh ka lugyargyon o aktivitetya kote ka loshakeren amare qhavoren.

Qhavorengo dive decizisalo pe data 1 Juni (1925), vash o sebepi kay adikardili e Lumiaki Konferenca vash o Shukaripe e Qhavorengo ani Jenava.

Ini seske amare qhavore ano phare kondicie phiravena poro bayripasko porocesi thay ini seske sakova dive musay siyem te loshakera amare qhavoren, amen manga kay avdive te bahtakera e qhavorengo dive kote gndina kay o dadalarya si te loshakeren olen ano may lokhe forme!

On si amaro avutnipe!